Skilaboðin eru hávær og skýr...

...ríkisstjórnina burt! Það er löngu komið nóg. Ruslahaugar sögunnar eru fullir af stjórnmálamönnum sem þekkja ekki sinn vitjunartíma. Er ríkisstjórnin virkilega svo úr takt við almenning í landinu að hún fatti ekki að fólk er búið að fá nóg. Meira en nóg. 20 janúar á ekki einungis að vera merkisdagur í bandarískri sögu. Gerum hann að merkisdegi í íslenskri sögu líka. Marchon, citoyens!

Mótmæla aftur í dag

Framsókn gerir upp við fortíðina

Framsóknarflokkurinn rær nú lífróðri til að bjarga flokknum frá útrýmingu. Mönnum fortíðarinnar er gersamlega hafnað, og klár ungur maður valinn til forystu. Það getur vel verið að honum takist að bjarga hræinu þó að ég sé þess efins að flokkurinn sé á vetur setjandi. E.t.v. tekst Sigmundi að bjarga því sem bjargað verður þannig að úr verði ca. 10-15% miðjuflokkur sem væri stjórntækur. Ef einhverjum tekst það þá væri það Sigmundi. Ég hef seint talist til aðdáenda Framsóknarflokksins, en verð að gefa þeim kredit fyrir að reyna að bjarga flokknum með því að kjósa Sigmund formann. Nú er bara að sjá hvort aðrir stjórnmálaflokkar nái þessu og sjái að það þarf að hreinsa út úr fjósinu.

Það sem mér finnst standa uppúr há Sigmundi er að hann segir réttilega að umræðan um mögulega aðild að ESB sé ekki það sem skipti máli nú. Fyrst þarf að takast á við efnahagshrunið. Það verður ekki gert nema með því að ríkisstjórnin fari frá með góðu eða illu.

Vill færa flokkinn frá hægri

Það þýðir ekkert bara að væla um þetta Kalli...

eruð þið ekki þátttakendur í þessari ríkisstjórn? Hversu lengi ætlið þið að láta Sjálfstæðisflokkinn vaða yfir ykkur? Seðlabankastjórnin situr enn, allir sömu menn eru enn í Fjármálaeftirlitinu, bankarnir eru enn í höndum brennuvarganna og almenningur borgar brúsann. Er ekki löngu nóg komið?

Vill kvótann á markað

Hvers vegna er kvótinn ekki boðinn upp?

Nú er ég sammála aukningar kvótans, en er þjóðin svo vel stödd fjárhagslega að hún hafi efni á því að gefa útgerðarmönnum enn meiri kvóta gefins. Hvar í andskotanum er Samfylkingin, hvaða áhrif hefur hún í ríkisstjórninni? Burt með þessa ríkisstjórn, hún er búin að gera nógu mikinn skaða nú þegar.

Viðbótin skilar 10 milljörðum

Forgangsverkefni í öryggismálum þjóðarinnar

Á meðan Landhelgisgæslan er fjársvelt og verður að segja upp fjölda fólks eyðum við ennþá hundruðum milljóna í stríðssamtökin NATO sem stuðla alls ekki að neinu öryggi landsmanna. Telja menn það virkileg að mikilvægara sé að borga fyrir einhverjar gagslausar herþotur yfir landinu heldur en að tryggja öryggismál sjómanna og koma í veg fyrir þjófnað á fiskimiðunum í gegnum Landhelgisgæsluna? Í alvöru, eitt af því fáa sem heldur í okkur lífinu er fiskútflutningurinn og við skerum saman fjárveitingar til Landhelgisgæslunnar á meðan við eyðum í NATO vitleysuna. Göngum þegar úr þessum samtökum og notum peningana sem sparast til raunverulegra öryggismála þjóðarinnar, ekki í einhverja ímyndaða hættu.

NATO-ráðstefna um öryggi á norðurslóðum

Til hamingju Hörður

Hörður er vel að þessu kominn, táknrænn fyrir uppreisn almennings sem á endanum hlýtur að leiða til hruns ríkisstjórnarinnar og alls þess hyskis sem situr við skemmdarverk í enn í valdastólum. Ég verð sífellt sannfærðari að ef ríkisstjórnin víki ekki með góðu á allra næstu vikum þá verði henni einfaldlega hent af almenningi og 2009 verði minnst sem byltingarárs. Fólkið á kröfu á því að brennuvargarnir séu ekki í slökkvistarfinu og að þjófnaðinum á almannaeignum verði þegar í stað hætt. Krafan hlýtur að vera ríkisstjórnina frá strax og kosningar innan nokkurra vikna.

Ég þakka hér með öllum lesendum mínum fyrir samskiptin á árinu og óska öllum gleðilegs nýs byltingarárs! Baráttan er rétt að byrja.

Hörður Torfason maður ársins á Rás 2

Ótrúlegur hroki

Hvílíkur hroki. Davíð er gersamlega dottinn úr tengslum við raunveruleikann. Hann er í dag aumkunarverð persóna sem átti að baki glæstan pólitískan feril sem nú er í svaðinu. Hann er okkar Geore W. Bush, pólitíkus sem gert hefur ótrúlegan skaða en virðist ekki fatta það. Davíð fór fyrir ríkisstjórninni sem einkavinavæddi banka almennings, gaf þeim frjálsar hendur við að breyta Íslandi í spilavíti þar sem allir vinningar fóru í vasa gæðinganna en tapið var borið af almenningi. Svo brást hann gersamlega vaktina sem seðlabankastjóri. Til að kóróna verkið hefur hann gert Ísland að athlægi sem einn fáránlegasti seðlabankastjóri mannkynssögunnar, opnar varla muninn án þess að kosta okkur milljarðatugi. Það eina jákvæða sem virðist koma frá honum er að menn geta skemmt sér við að lesa grínsögur af honum í heimspressunni. Hann hefur talið sér trú um að þetta sé öllum öðrum að kenna, hann hafi alltaf varað við þessu og bla bla bla. Það liggur við að maður vorkenni kallinum, maður myndi gera það ef hann hefði ekki valdið svona miklum skaða og heldur áfram að valda skaða með hverri mínútu sem hann situr í nokkru embætti. Ég held að sjálfstæðismönnum hljóti að líða eins og íhaldsmönnum í Bretlandi leið þegar Margaret Thatcher hélt áfram að bjóða"góðmenninu" og vini sínum Augusto Pinocet í te eftir að hún yfirgaf pólitíkina. En Bretar höfðu allavega vit á að hleypa frúnni ekki í neitt embætti sem skipti máli. Tökum Davíð á orðinu, hendum honum úr Seðlabankanum og látum hann fara aftur í pólitík og verða sér að athlægi þar.

Vissulega er Davíð fjarri því að vera eini blóraböggullinn. Auðvitað eru bónusfurstarnir og fjárglæframennirnir aðal sökudólgarnir. Sjálfstæðisflokkurinn er aðal sökudólgurinn pólitískt og samstarfaðilar þeirra í ríkisstjórnum, Framsóknarflokkurinn og Samfylkingin eru líka sekir. Síðastnefndi flokkurinn brást pólitískt  vaktina og hefur gersamlega brugðist við stjórn kreppunnar. Allir sökudólgarnir sitja enn í stöðum sínum, bönkunum er stjórnað af sama fólki og eignir almennings seldar (gefna) til vildarvina með leynd. Það er löngu komið nóg. Það þarf að skipta um allt settið, ríkisstjórnina, seðlabankastjórnina og allt settið sem stjórnar enn almenningsvæddu bönkunum. Ya basta!

Davíð: „Þá mun ég snúa aftur"

Halló, á hvaða forsendum?

Eiga stjórn og stjórnarandstaða að "snúa bökum saman" til að vernda seðlabankastjórn? Eiga stjórn og stjórnarandstaða að "snúa bökum saman" til að vernda fjármálaeftirlitið? Eiga stjórn og stjórnarandstaða að "snúa bökum saman" til að láta brennuvargana halda áfram að stjórna bönkunum? Eiga stjórn og stjórnarandstaða að "snúa bökum saman" til að selja eigur þjóðarinnar með leynd í skjóli "bankaleyndar"? Eiga stjórn og stjórnarandstaða að "snúa bökum saman" til að setja heimilin og fyrirtækin í landinu á hausinn með hávaxtastefnu? Því miður Ingibjörg Sólrún, þið fenguð ykkar tíma, nú er komið nóg. Ekki einn einasti einstaklingur hefur verið dreginn til ábyrgðar fyrir að skuldsetja börnin mín. Enda er lögreglan upptekin við að handtaka mótmælendur sem voga sér að segja hingað og ekki lengra.

Stjórn og stjórnarandstaða snúi bökum saman

Flauelsbyltingin í Tékkóslóvakíu

Fyrir réttum 19 árum var byltingarástand í Tékkóslóvakíu. Atburðirnir hófust fyrir alvöru 16. Nóvember 1989 og enduðu með algjöru hruni stjórnkerfisins í lok desember það ár þegar skáldið og andófsmaðurinn Václav Havel var kjörinn forseti landsins. Þó að efnahagskerfi landsins væri í skárra ástandi en flestra nágrannalandanna þá var ljóst að ríkisstjórnin var pólitískt gjaldþrota. Fólkið var búið að fá nóg. Það reis upp gegn ríkisstjórninni og þrátt fyrir að stjórnvöld reyndu að lægja öldurnar með málamiðlunum og óljósum loforðum um umbætur, samþykkti fólkið það ekki. Nú var komið nóg. Skipta þurfti um allt settið. Flauelsbyltingin svokallaða var hafin. Byltingin tók samtals um einn og hálfan mánuð og var nær algjörlega friðsamlega. Ríkisstjórnin hékk um tíma en gafst að lokum upp. Fólkið hafði sigur.

Nú er flauel ekki mjög áberandi á Íslandi. Hins vegar er flís mjög almennt notað meðal almennings. Orðið flís hefur líka þá skemmtilegu skírskotun að það þýðir bæði óunnin ull af sauðfé og hið nútímalega hlýja efni sem nær allir íslendingar klæðast í dag. Er í raun hinn nýi lopi, skírskotar bæði til róta okkar sem sauðfjárbænda og til nútímans sem hátækni iðnaðarframleiðsla. Svo er er hið auðvitað hið gyllta flís úr grísku goðafræðinni, sem vísar til flótta undan erfiðleikum. Flís stefnir því til framtíðar, en er með sögulegum skírskotunum. Nú er ég staddur í London, Bretlandi en mun koma heim fljótlega. Ég mætti á fyrsta mótmælafundinn gegn ríkisstjórninni og seðlabankastjóra á Austurvelli fyrir rúmum mánuði í flísjakkanum mínum. Þegar ég kem heim aftur mun ég mæta á Austurvöll á ný í flísjakkanum mínum. Og vænti þess að þúsundir annarra muni gera slíkt hið sama. Er ekki komið nóg?

Ónýtur banki bjargar ónýtri krónu

Framsóknarflokkurinn 1916-2008 RIP

Framsóknarflokkurinn hefur nú gefist upp og er ekki nema gott um það að segja. Þessi flokkur var orðin undir það síðasta að atvinnumiðlun fyrir metnaðarfull meðalmenni, þó vissulega eigi flokkurinn glæsta fortíð sem nú verður einungis efni sögubóka. Hann átti fyrir löngu síðan að vera kominn á byggðasafn. Flokkurinn stóð fyrir, ásamt Sjálfstæðisflokknum, fyrir einkavinavæðingu bankakerfisins sem gerði einstaklinga tengda flokknum að milljarðamæringum og endaði með því að skuldsetja landsmenn til áratuga með bankahruninu, sem flokkurinn ber næstum því jafn mikla ábyrgð á og Sjálfstæðisflokkurinn. fyrir um 15 árum ákvað flokkurinn, undir forystu þáverandi formanns, Halldórs Ásgrímssonar, að leggja af alla hugmyndafræði og breyta flokknum í atvinnumiðlun sem einbeitti sér að því að sitja við kjötkatlana. Nú eru katlarnir tómir og því að litlu að sækjast eftir og því augljóslega sjálfhætt þessu flokksbasli. Þetta virðist Guðni hafa skilið og sagt bless. Nú situr einkavinavæðingarfrúin sem "formaður" líksins, en allir vita að sá uppvakningur lifir ekki lengi. Þó vissulega verði sjónarsviptir af hvarfi Framsóknarflokksins úr pólitík, þá munu ekki margir syrgja hann, enda augljóslega vitagagnslaust fyrirbæri í dag. Velkominn á byggðasafnið.

Guðni segir af sér þingmennsku