Loksins, loksins...

... það var kominn tími til. Eins og Steingrímur bendir á þá eru slíkar reglur ekki óalgengar erlendis og fjölmörg lönd, þ.á.m. Bandaríkin undir stjórn Barak Obama, ætla að taka á þessum gjörningum með festu.

Til þess að lágmarka skaðann sem skattaparadísir valda þarf auðvitað helst að ná fram alþjóðlegum reglum sem banna slíkt. En á meðan það er ekki gert þurfa þjóðir eins og Íslendingar að setja slíkar reglur fyrir sjálfa sig. Tel síðan að næsta skrefið eigi að vera að setja veltuskatt á allar fjármálatilfærslur, hvort sem þær eru á markaði eða í gjaldeyri. Slíkur skattur gæti verið um 1%. Fyrir þá sem eru að kaup gjaldeyri eða fjárfesta á "venjulegan" hátt skipti slíkur skattur litlu máli. Hins vegar myndi slíkur skattur stórminnka spákaupmennsku og því koma hagkerfinu vel. Síðan yrðu auðvitað skattatekjur af slíku sem vissulega er þörf á. Auðvitað á að koma á slíkum skatti alþjóðlega, samtökin ATTAC hafa barist fyrir slíku í langan tíma. Slíkur skattur er oftast nefndur Tobin skattur eftir bandaríska hagfræðingnum James Tobin sem setti fram hugmyndina á 8. áratugnum.

Tekið á skattaparadísum

Vel gert hjá ríkisstjórninni...

...gott að fá inn sérfræðing sem hefur áður tekist á við bankakreppu þó lítil hafi verið í samanburði við okkar. Svein virðist einmitt vera maðurinn sem við þurftum eftir að vera loksins búin að losna við Davíð. Líka gott að fá utanaðkomandi mann sem mun færa bankanum nýja sýn á vandann. Glöggt er gests augað.

Nýr seðlabankastjóri

Ágætt hjá ellilífeyrisþeganum...

... hann dauðlangar greinilega að tukta til "krakkana" í flokknum! Annars má Jón Baldvin eiga það að hann hefur færst langt til vinstri frá því að hann var í Bandaríkjunum, teldist líklega til vinstri krata í dag frekar en hægri krata.

Jón Baldvin tilkynnir framboð

Í framboð í forvali VG í kraganum

Ég hef ákveðið að bjóða mig fram í 3-4 sæti í forvali VG í suðvestur kjördæminu. Fylgist með blogginu og síðunni minni á facebook. Hér kemur fréttatilkynningin:

Guðmundur Auðunsson stjórnmálafræðingur sækist eftir 3.-4. sæti á framboðslista VG í Suðvestur kjördæminu (í forvali sem fer fram þann 14. mars næstkomandi). Guðmundur er fæddur 28. október  1963 og alinn upp á Álftanesi og í Reykjavík en hefur búið að mestu erlendis síðan 1991. Hann hefur allan tímann haft ríkuleg tengsl heim, komið margsinnis og fylgst náið með stjórnmálum.

Guðmundur leggur áherslu á  nauðsyn þess  að byggja upp nýtt samfélag á þeim rústum  sem frjálshyggjan hefur skilið eftir sig „Ástæðan fyrir því að ég gef kost á mér í framboð er að nú er lag að stofna nýtt og réttlátt samfélag á rústum þess sem nú er hrunið. Auk þess að hafa starfað mikið að félagsmálum þá hef ég búið lengi erlendis. Tel ég það kost að fólk sem ekki hefur verið í hringiðu stjórnmála seinustu ára komi inn með nýtt og ferskt sjónarhorn. Við Íslendingar erum ekki ein um það að búa við hrun spilavítiskapítalismans þó vissulega sé ástandið hjá alþýðu manna á Íslandi skelfilegt. Fólk út um allan heim er nú að borga skuldirnar sem alþjóðafjármálakerfið skilur eftir sig. Hvort sem er á Íslandi, í Afríku, Asíu, Bretlandi eða Bandaríkjunum þá er það almenningur sem borgar. Barátta okkar fyrir að byggja upp nýtt samfélag byggt á jöfnuði og réttlæti er því hluti af baráttu bræðra okkar og systra út um allan heim. Þess vegna býð ég mig fram, ég vil leggja mitt af mörkum til nýrrar framtíðar“ segir Guðmundur.

Félags og stjórnmálastarf

Guðmundur sat í stjórn Nemendafélags Fjölbrautarskólans í Breiðholti og var í stjórn Landssambands mennta- og fjölbrautarskólanema og var framkvæmdastjóri þeirra samtaka um hríð. Guðmundur sat í samnorrænni stjórn um þróunarverkefnið NOD-85 á vegum íslenskra framhaldskólanema. Oddviti Félags vinstrimanna (FVM) í Stúdentaráði Háskóla Íslands (SHÍ) 1985-1987, tilnefndur í stjórn Lánasjóðs íslenskra námsmanna 1986 og sat í stjórn SHÍ. Formaður FVM 1988 og stofnfélagi Röskvu, samtaka félagshyggjufólks í HÍ sama ár. Guðmundur sat í framkvæmda- og miðstjórn Alþýðubandalagsins, í stjórn Æskulýðsfylkingar Alþýðubandalagsins og í stjórn Æskulýðssambands Íslands. Guðmundur gerðist síðan stofnfélagi Vinstrihreyfingarinnar, græns framboðs 1999 og er félagi í VG í Kópavogi. Hann var einn af frumkvöðlum indefence.is herferðarinnar þar sem yfirgangi breskra stjórnvalda gegn Íslendingum var mótmælt. Guðmundur er líka áhugamaður um bridge, var íslandsmeistari í yngri flokki 1985 og 1986 og spilaði með unglingalandsliðinu á Norðurlandamótinu 1987.

Menntun og starfsferill

Guðmundur lauk stúdentsprófi frá Fjölbrautarskólanum í Breiðholti 1984, BA í stjórnmálafræði frá HÍ 1991 og MA í alþjóðahagfræði og alþjóðasamskiptum frá Johns Hopkins háskólanum í Bandaríkjunum 1993. Guðmundur  var framkvæmdastjóri Amnesty International á Íslandi 1988-1991 og starfaði sem kosningastjóri Alþýðubandalagsins í Kópavogi 1991. Eftir háskólanám hefur Guðmundur starfað innan hugbúnaðar- og fjarskiptageirans í Washington DC, Singapore og London. Hann er nú framkvæmdastjóri Snertu UK í London. Auk þess rekur Guðmundur ráðgjafaþjónustu og situr í stjórnum tveggja íslenskra hugbúnaðarfyrirtækja í Bretlandi.

Guðmundur Auðunsson er kvæntur Elizabeth Jane Goldstein þróunarráðgjafa í Afríku. Betsy er frá Washington borg í Bandaríkjunum. Guðmundur á 3 syni, Einar Óla, verkfræðinema í Reykjavík, Ísak Irving 6 ára og Kolmar Leigh 2 ára.

 

 

Greinilegt að sumir hafa ekkert lært ennþá...

...hvernig á annars að skýra hrokann sem felst í orðum Haraldar Þórs Stefánssonar að "það væri ekki venjan að yfirmenn tjáðu sig um samskipti við einstaka starfsmenn". Það er auðvelt að sjá hvað framkvæmdastjórinn er að fara, hvernig vogaði Halldór að ybba sig og gagnrýna græðgina í framkvæmdarstjóranum, framkvæmdarstjórnar og aðrir yfirmenn tjá sig aldrei um samskipti við pöpulin. Halldór er nú búinn að missa vinnuna fyrir að segja sannleikann, meðan framkvæmdastjórinn getur sýnt hversu merkilegur hann er þegar hann ekur um að lúxuskerrunni. Ég mæli með því að 80% skattur verði þegar í stað settur á bílafríðindi. Slíkur lúxusháttur tilheyrir hinum gamla tíma græðginnar og á ekkert heima í nýja lýðveldinu. Þar sem lið eins og Haraldur virðast ekki fatta þetta þá á bara að nota almannavaldið og skattleggja þetta í botn.

Bloggari rekinn fyrir skrif

Nú þarf að bretta upp ermarnar...

... þessi ríkisstjórn getur ekki verið "starfsstjórn". Of mikið er í húfi. Það þarf að hreinsa til í bönkunum, það þarf að rekja horfna peninga og frysta eigur fjárglæframannanna. Þó þessi ríkisstjórn hefði ekki meirihluta á þingi tel ég að hún geti náð miklu fram, Framsóknarflokkurinn mun ekki standa í vegi fyrir róttækum aðgerðum. Síðan verða kosningar í vor og þá rækilega tekið til í þingmannahópnum. Þá ætti góður meirihluti á þingi að geta skapast fyrir róttækum breytingum á íslensku samfélagi þannig að við reisum samfélag jöfnuðar og réttlætis úr rústum spilavítiskapítalismans. Byltingin er rétt að byrja!

Falið að mynda stjórn

Veit að landsmenn óska Geir góðs bata í veikindunum...

...Og ekkert nema eðlilegt að Þorgerður taki við skyldum hans sem formaður Sjálfstæðisflokksins á meðan hann fer í aðgerð. Hins vegar kemur það ekki til greina að núverandi ríkisstjórn sitji áfram og því kemur ekki til greina að Þorgerður verði forsætisráðherra. Ríkisstjórnin verður að fara frá strax. Við tæki annaðhvort utanþingsstjórn eða ríkisstjórn VG og Sf bætt með utanþingsfólki sem starfa myndi fram að kosningum. Ríkisstjórninni er ekki stætt lengur burtséð frá öllum veikindum. Hver dagur skiptir máli, þetta hefur grasrótin í Samfylkingunni fattað og í raun fáránlegt ef Samfylkingin ætlar sér að sitja áfram í ríkisstjórn án stuðnings flokksmanna. Þá er lítið annað eftir en að finna nýja Héðinn Valdimarsson eða Hannibal Valdimarsson í flokknum. Mótmælin hljóta að halda áfram þar til stjórnin fer frá völdum.

Þorgerður leysir Geir af

Meðan Árni Páll situr fastur í fílabeinsturninum í Brussel...

... virðast allavega sumir Samfylkingarmenn vera í Reykjavík. Brava Steinunn, brava Bryndís, það er löngu komið nóg. Nýja ríkisstjórn strax!

Mikilla tíðinda að vænta

Halló Árni Páll, ESB er ekki það sem skiptir máli í dag

Eru þingmenn virkilega gersamlega dottnir úr öllum tengslum við þjóðina? Það er sjálfsagt að líta á ESB inngöngu, en það er ekki það sem skiptir máli í dag og ekki það sem fólkið er að krefjast að gert verði í dag. Það sem skiptir máli er að hreinsa út úr bönkunum og bjarga því sem bjargað verður í brunarústunum. Það er krafa almennings, ekki uppgjöf á stjórnmálum og halda að einhverjir júrókratar geti bjargað málunum. Samfélagið brennur en Árni Páll virðist upptekinn af því hvaða eldvarnareftirlit sé best. Fyrst þarf að slökkva eldana, það verður ekki gert með þessari ríkisstjórn, þessu fjármálaeftirliti, þessari seðlabankastjórn og þessum stjórnendum bankana, sem eru upp til hópa þeir sömu og kveiktu eldana. Ræsum slökkviliðið og slökkvum eldana fyrst áður en við förum að ræða um fyrirkomulagið á eldvarnareftirliti framtíðarinnar.

Það sem Samfylkingin þarf að gera er að hlusta á grasrótina í Samfylkingunni í Reykjavík og rjúfa stjórnarsamstarfið strax. Ef það verður ekki gert þá hvet ég hugsandi ráðherra flokksins að segja af sér og lýsa yfir andstöðu við ríkisstjórnina. Það er það sem skiptir máli nú í dag, ekki eitthvað þrugl um ESB.

ESB-umsókn þolir enga bið

Bravó Sigmundur...

... nú geta Samfylkingarmenn ekki lengur skýlt sér bak við afsökunina um "stjórnleysi" hætti þeir  ríkisstjórnarsamstarfinu. Greinilega breytingar á bæ Framsóknarflokksins. Boltinn er nú hjá Samfylkingunni, vilja þeir losna við Sjálfstæðisflokkinn úr ríkisstjórn eða halda hræinu enn á lífi. Ef Samfylkingin sparkar ekki í rassgatið á sjálfri sér þá hangir hún einfaldlega í snörunni með Sjálfstæðisflokknum og verður refsað af kjósendum fyrir það þegar kosningar verða. Ríkisstjórnin mun falla, engin spurning um það. Nú hefur hinn "nýi" Framsóknarflokkur gefið Samfylkingunni boltann. Hvort að þeir ákveða að sækja fram eða skora sjálfsmark er nú í höndum flokksfélaga Samfylkingarinnar.

Vill verja minnihlutastjórn falli