Allt upp á borðið

Það er gersamlega óþolandi að verið sé að halda leyndum upplýsingum fyrir þeim sem koma til með að borga fyrir sukkið, almenningi. Það er lágmarkskrafa að allt sé sett upp á borð og þessu pukri hætt þegar í stað.

Steingrímur J. krefst upplýsinga

Enn er kaupverð ekki gefið upp

Enn er verið að selja eigur okkar með leynd, við höfum kröfu á því að fá að vita kaupverðið. Hvað er verið að fela? Kaupverð á skráðum fyrirtækjum verður að gefa upp, hvers vegna er verið að fela fyrir okkur verðið sem fæst fyrir eigur almennings? Er verið að einkavinavæða þetta? Fá einhverjir kommision? Þetta lyktar allt, krafan hlýtur að vera að allt komi upp á yfirborðið, hættum þessu pukri.

Sænskar eignir Kaupþings seldar

Fjölmiðlafulltrúi FL Group?!

Hjálp,

Ráðinn fjölmiðlafulltrúi forsætisráðherra

8 ára í járnum?!

Þessi 8 ára drengur er augljóslega stórskemmdur og þarf vissulega á geðrannsókn að halda. En leiða hann í járnum inn í réttarsalinn?! Eru menn gengnir af göflunum. Ég hef staðið í þeirri meiningu að járn á föngum væru til komin til þess að þeir yrðu engum að skaða eða gætu ekki flúið. En halda menn virkilega að 8 ára barn þurfi á járnum að halda? Augljóslega er hér um að ræða sirkussýningu, fyrir blóðþyrstan almenning. Það er eitthvað verulega að í samfélagi sem dregur 8 ára barn inn í réttarsal í járnum, sama hvað alvarlegur glæpur hans er. Er ekki annars Arizona þaðan sem John McCain er frá?

Átta ára gamall sakborningur mætti fyrir dómara

Af öllum ástæðum afsagnar...

...þá er þetta eini þingmaðurinn sem hefur sagt af sér. Í alvöru, allir þeir þingmenn og ráðherrar sem borið hafa ábyrgð á hruninu sitja sem fastast kyrjandi "ekki benda á mig" sitja sem fastast án þess að skammast sín, þar á meðal viðskiptaráðherrann sem bar ábyrgðina á einkavinavæðingu bankanna sem við erum nú að borga fyrir. Seðlabankastjóri situr enn, en greyið hann Bjarni er látinn fjúka!

Nú hef ég svo sem litlar skoðanir á Bjarna greyinu, en hann má eiga það að hafa verið eini þingmaður exbé sem ekki sat á þingi undir BD hryllingsstjórninni. En það sýnir hversu sjúkt íslenskt stjórnkerfi er þegar hann er eini hausinn sem hefur verið látinn fjúka. Í alvöru, fatta menn virkilega ekki að allt á eftir að sjóða uppúr? 

Guðni: Bjarni axlar ábyrgð

Ungir sýna ábyrgð

Breyttar forsendur í efnahagsmálum kalla ávallt á endurskoðun stefnumála. Slík endurskoðun sýnir hugsun og ábyrgð. Vinstrimenn hafa ávallt verið á móti ESB vegna efnahagsmála og lýðræðishalla hjá samtökunum. Slík andstaða er auðvitað gerólík þjóðernisrembingi sem einkennir andstöðu hægrimanna. Því er sjálfsagt að líta á ESB á ný. Kúdos til ungliðanna.

Persónulega þarf mikið til að sannfæra mig um ágæti þess að ganga í ESB. En nýir tímar kalla á nýjar áherslur og er ég því tilbúinn að líta á málið. Persónulega vil ég sjá sterka félagslega Evrópu, byggða á samvinnu og velferð. Mikið hefur vantað á að ESB starfi á þessum grunni. En hrun spilavítiskapítalismans hefur breytt heiminum og breytir e.t.v. ESB líka þó of snemmt sé um það að segja á þessum tímapunkti. Þessu skulum við fylgjast með. Gordon Brown er allavega hættur að væla um "deregulation, deregulation" eins og hann hefur gert síðastliðin 10 ár. Ef ESB sér að sér í efnahagsmálum, eins og samtökin hljóta að gera, og embættismannavaldið verður takmarkað, þá má alveg líta á samtökin aftur. En hlutir þurfa að breytast ef samtökin eiga að virka í nýjum heimi. Félagslega Evrópu, já takk, en áframhaldandi Evrópu spilavítiskapítalista viljum við ekkert með hafa. Lítum því raunhæft á málin, forðumst sleggjudóma, en forðumst líka á að líta á ESB sem einhverskonar allsherjar bjargvætt. Fyrst þurfum við að hreinsa til heima hjá okkur.

Nýr tónn í Evrópuumræðu VG

Gamli maðurinn kemst beint að kjarna málsins.

Það sem hann telur mikilvægasta verkefni nýja forsetans er að berjast fyrir friði í heiminum og gegn fátækt og sjúkdómum. Þetta þrennt hefur verið utanveltu í bandarískum stjórnmálum og vonandi hlustar Obama á Mandela og gerist sósíalisti eins og kempan, þó líklega megi hann ekki kalla þar sósíalisma. Bjarga þarf bandaríska heilbrigðiskerfinu og stunda stórfellda tilfærslu frá hinum ofsaríku bónusfurstum til fátæks bandarísks almennings

Sjálfur er ég hóflega bjartsýnn með Obama. Hann er auðvitað enginn róttæklingur á alþjóðamælikvarða, en hefur alla burði til að verða besti forseti Bandaríkjanna síðan Franklin Delano Roosevelt var og hét. Nú er bara að krossleggja fingur og vona að hann klúðri þessu ekki með einhverskonar clintonsku miðjumoði. Við á heimili mínu vonum auðvitað hið besta, enda eru þrír bandarískir ríkisborgarar heima hjá mér.

Mandela fagnar kjöri Obama

Jæja, var bönkunum þá betur komið í einkavinaeign?

Fyrir nokkrum árum voru bankar almennings einkavinavæddir. Heittrúaðir frjálshyggjumenn töluðu um hversu "fáránlegt" það væri fyrir almenning að reka banka, þeim "væri betur komið í höndum einkaaðila" o.sv.fr. Nú er auðvitað komið í ljós að allt kjaftæðið um "fé án hirðis" þýddi í raun, "gæðum sem mest á almenningi, ef vel gengur fáum við gróðann, ef illa fer ber almenningur tapið". Nú kemur síðan í ljós að bankarnir virðast hafa tekið sig saman að reyna að þvinga ofsagróða til sín á kostnað almennings með því að fella krónuna. Hugmyndin var augljóslega að sækja stóra bónusa vegna gjaldeyrisgróða á kostnað almennings, sem hefði borgað brúsann með aukinni verðbólgu og hærri lánum. Þetta var hluti af stórfelldum píramídaleik sem nú hefur sprungið framan í þjóðina.

Nú spyr ég, halda menn að Landsbankinn og Búnaðarbankinn, ef þeir hefðu verið áfram ríkisbankar, hefðu tekið sig saman að rústa efnahagskerfi landsins á þennan hátt? Þetta gerir það augljóst að einkaaðilum er ekki treystandi fyrir bönkunum. Almenningur verður að reka bankana og þeim einkabönkum sem starfa vilja verður að setja þröngar skorður. Að sjálfsögðu á að reka bankana á faglegan hátt, ekki pólitískan hátt eins og í gamladaga. En augljóst er allavega að einkaaðilum er ekki treystandi fyrir bankarekstri.

Árás á fullveldi þjóðarinnar

Á Facebook eru líka margir Íslendingar erlendis...

... þessi tala telur bara þá sem eru búsettir á Íslandi. Ég er viss um að þúsundir Íslendinga eru á Facebook og búsettir erlendis eins og ég. Mjög góð leið til að vera í sambandi við vini og vandamenn út um allan heim. Mæli með Facebook við alla.

Fjórðungur þjóðarinnar á Facebook

Undirskriftir: Við erum ekki hryðjuverkamenn

Ég vil vekja athygli allra á undirskriftaherferð sem einstaklingar með tengsl við Bretland höfum sett af stað. Slóðin er http://www.indefence.is/. Við viljum hvetja alla til að skrifa undir þetta til að leggja baráttu okkar til að losna við hryðjuverkastimpilinn og glæpamannastimpilinn sem búið er að setja á okkur hér í Bretlandi. Hugmyndin er síðan að fylgja þessu eftir með greinaskrifum í breskum fjölmiðlum, því verulega hefur hallað á okkur þar í umræðunni. Ég vil hvetja sem flesta til að skrifa undir áskorunina, því fleiri sem gera það, því meiri athygli fær átakið. Ég vil undirstrika að þetta er einungis borgaralegt átak einstaklinga, ávarp frá íslensku þjóðinni til bresku þjóðarinnar. Stjórnvöld eiga hér ekki hlut að máli. Sýnum nú samtakamátt okkar og skrifum undir.

Landsbankinn af hryðjuverkalista