Betur má ef duga skal

Það yrði skelfilegt fyrir íslendinga ef niðurstöður kosninganna væru þær einar að fylgi færðist dálítið milli stjórnarflokkanna og á milli stjórnarandstöðuflokknanna. Samkvæmt nýjustu Gallup könnuninni bætir ríkisstjórnin við þingstyrk sinn ef eitthvað er þó svo að Framsóknarflokknum sé réttilega refsað fyrir íhaldsþjónkun sína. Eitthvað virðast félagar mínir í Samfylkingunni kætast, en einhverjar tilfærslur milli vinstriflokkanna skipta litlu máli ef við ætlum að breyta íslenska samfélaginu. Betur má ef duga skal. Nú þurfa vinstrimenn að bretta upp ermarnar, flokkarnir þurfa að ná sem næst 45% fylgi samanlagt. Það var alltaf vitað að sveiflan yfir á VG væri ýkt enda erfitt fyrir nokkurn flokk að þrefalda fylgi sitt. Tvöföldun yrði auðvitað ótrúlegur sigur. En þó vissulega stefni í það að VG verði sigurvegari kosninganna þá yrði slíkur sigur bitur ef ríkisstjórnin héldi áfram eina ferðina enn.

Annars verður maður að vona að Sjálfstæðisflokkurinn sé vel ofmetinn um 4-5% fylgi í þessari könnun. Tölurnar sem birtar voru nýlega úr Reykjavík Norður voru frábærar, vinstriflokkarnir með vel yfir 50% fylgi og exbé fjarri því að ná manni inn. Það var könnun sem vert var að fagna, ekki þessi lélega könnun sem voru slæmar fréttir fyrir vinstrimenn. Brettum upp ermarnar og fellum ríkisstjórnina. Ég kýs V, aðrir vinstrimenn kjósa S. Það er samanlagt fylgi vinstriflokkanna sem skiptir mestu.

 

Samfylkingin aftur fram úr VG

Bjargað fyrir horn

Sú staðreynd að Tony Blair er á útleið úr pólitík virðist hafa komið í veg fyrir algjört hrun verkamannaflokksins, þó vissulega sé 26% fylgi ömurleg niðurstaða. Enda er Blair og "New Labour" nær búinn að rústa Verkamannaflokknum. Spurningin er sú hvort flokkurinn nær að rétta úr sér eftir að skemmdarverkamaðurinn og stríðsglæpamaðurinn Tony Blair hverfur á braut. Það tók verkalýðsfélögin og verkafólk áratugi að byggja upp breska Verkamannaflokkinn. Það hefur tekið Tony Blair og litlu ljótu klíkuna hans um 10 ár að rústa þeirri uppbyggingu. Ekki einungis er stefna "New Labour" eitthvað til hægri við Sjálfstæðisflokkinn heldur hefur Blair litið á það sem helsta pólitíska markmið sitt að stappa á vinstrisinnum og troða hægrisinnuðum skoðunum sínum uppá flokkinn. Írak stríðið og þjónkunin við klerkastjórnina í Washington er bara eitt af mörgu. Sem betur fer er þessi skemmdarverkamaður á leið út úr pólitík. Ætli hann byrji þá ekki feril sem kvöldverðarræðumaður hjá stórfyrirtækjunum sem munu borga honum stórfé fyrir þjónkunina og að hlusta á hann segja frá því hvernig honum tókst að stappa á verkafólki og félögum þeirra til að þjóna hagsmunum atvinnurekenda.

Verkamannaflokkurinn tapar fylgi

Ha, hver er að tala um kynlífsþræla?

Hvernig í ósköpunum kemst Mogginn að þeirri niðurstöðu við lestur greinarinnar um kynlíf steinaldarmanna að þeir hafi haldið "kynlífsþræla"? Það er hvergi talað um slíkt, enda fjarstæða að halda því fram að slíkt hafi tíðkast. Megininntak rannsóknanna er að steinaldarmenn hafi stundað kynlíf til sér til skemmtunar og til að bindast innan hópa. Sem hluti af þessum kynlífsiðkunum hafi þeri stundað leiki. Orðrétt segir á ensku:

"Practices ranging from bondage to group sex, transvestism and the use of sex toys were widespread in primitive societies as a way of building up cultural ties."

Hvernig í ósköpunum fá menn það út að hér sé verið að vísa í að steinaldarmenn hafi haldið "kynlífsþræla"?  Þvert á móti virðist sem viðhorf til kynlífs hafi verið frjálslegt og stundað af báðum kynjum sér til ánægju. Hugtakið "bondage" vísar til kynlífsleikja. Þeir sem hafa lágmarks þekkingu á samfélögum safnara og veiðimanna (steinaldarmanna) vita að það er gersamlega út í hött að tala um að "halda kynlífsþræla", enda er engin ástæða til þess þegar viðhorf til kynlífs er frjálslegt og enginn getur "slegið eign sinni" á nokkur annan. Þrælar og þrælahald kemur ekki til fyrr en með landbúnaðarsamfélögunum.

Steinaldarmenn lifðu fjörugu kynlífi

Í járnum

Það stefnir í mjög spennandi kosningar. Vinstriflokkarnir eru með um 42.5% og Framsóknarflokkurinn skriðinn í tveggja stafa tölu. Stjórnin lafir samkvæmt þessu og Íslandshreyfingin nær sér alls ekki á flug, gæti m.a.s. hjálpað stjórninni til að halda velli. Það má ekki gerast. Það verður að herða róðurinn. Framsókn endar líklega í um 12% (11.7% til að vera nákvæmur!), sem markar endalok flokksins sem þungaviktarafls í íslenskum stjórnmálum. Var að vonast eftir eins stafs tölu, en fer líklega niður í það í þarnæstu kosningum. Sjálfstæðisflokkurinn er enn of stór, þarf bara 25 þingmenn til að stjórnin haldi ef exbé fær 7, sem er ekki ólíklegt. Þó ég spái því að Flokkurinn fari  ekki yfir 36% þá getur það samt þýtt að stjórnin haldi velli ef atkvæði Íslandshreyfingarinnar falla dauð. Það má ekki gerast.

Fylgi Samfylkingar og VG jafnmikið

Eru þá útlendingar bak við þetta?

Framsóknarflokkurinn virðist allavega vera á því, enda segir flokkurinn að "að áletrunin á skiltunum sé slagorð, sem erlendir virkjanaandstæðingar hafi notað í aðgerðum sínum gegn Kárahnjúkavirkjun og uppbyggingu iðnaðar á Austurlandi." Er flokkurinn nú kominn í samkeppni við Frjálslynda flokkinn?

Annars virðist mér þetta bara vera fíflaleg strákapör sem gera ekkert annað en að hjálpa Framsóknarflokknum upp úr 7 í 8%. Líklega einhverjir krakkar á fylleríi.

Auglýsingaskilti Framsóknarflokksins á Egilsstöðum skemmd

Í Afríku eru barnahermenn endurhæfðir...

...og reynt að hjálpa þeim til að aðlaga sig samfélaginu eftir ömurleg stríðsátök. Bandaríkjamenn aðhyllast greinilega ekki slíka mannúðarstefnu, enda leggja þau sig fram að handtaka börn og halda þeim í fangabúðum. Gengu m.a.s. svo langt að handtaka svo ung börn sem 12 ára og fangað þau í Guantanamo (reyndar var þessum börnum sleppt eftir um tveggja ára vist í pyntingarbúðunum). Nú lögsækja þau barnahermann fyrir morð af því að hann réðist á erlendan innrásarher í Afganistan! Eru menn ekki í lagi? Bandaríkjastjórn telur greinilega að árásir á innrásarher þeirra séu morð og hryðjuverk, meðan þeim þykir ekki tiltökumál að drepa tugþúsundir almennra borgara í erlendum löndum. Hvernig í ósköpunum getur árás á innrásarhermann talist til morðs? Hvernig í ósköpunum dettur mönnum í hug að telja árásir á bandaríska hersetuliðið í Írak sem hryðjuverk (má m.a. benda á að bandaríska pressan talar enn um það sem hryðjuverkaárás þegar líbanskir skæruliðar réðust á bandaríska innrásarherinn í þeirra eigin landi 1982). Með sömu rökum voru allar árásir á þýska hermenn í seinni heimstyrjöldinni morð.

Þessi lögsókn á manni sem var handtekinn 15 ára gamall er auðvitað slík fjarstæða að maður hefði talið að jafnvel bandaríkjastjórn myndi ekki detta slík della í hug. Viðkomandi var augljóslega barnahermaður og átti að hjálpa honum til að aðlagast samfélaginu á ný. Er viss um að kanadamenn hefðu getað hjálpað honum. Að loka drenginn inni í pyntingarbúðum í  5 ár og lögsækja hann fyrir morð á innrásarhermanni sýnir auðvitað alveg ótrúlegan hroka og mannfyrirlitningu. Greinilegt að bandaríkjastjórn þarf að taka sér Afríkuríki sér til fyrirmyndar í mannréttindarmálum.

Fangi í Guantánamo-búðunum ákærður fyrir morð

Hrun Framsóknarflokksins staðfest í hverri könnuninni á fætur annari

Slæmu fréttirnar eru auðvitað að Sjálfstæðisflokkurinn virðist vera að bæta aðeins við sig í kjördæminu, sem er vonandi aðeins tímabundið. Spái að D endi á svipuðum slóðum og fyrir 4 árum, í um  38%. Vinstriflokkarnir eru með nær 44%, sem mætti vera betra en þetta er jú veikara kjördæmið fyrir þá í Reykjavík. Fyrsta uppsveifla Íslandshreifingarinnar í langan tíma sem sýnir að það er ekki hægt að afskrifa flokkinn alveg. Allavega er ljóst að menn verða að snúa bökum saman til að fella ríkisstjórnina.

Sjálfstæðisflokkur bætir við sig þingmanni í Reykjavík suður

Vinstrimenn verða að herða róðurinn

Slæmu fréttirnar í þessari könnun eru að Sjálfstæðisflokkurinn er allt of sterkur. Spái því samt að D sé töluvert ofmetinn, flokkurinn endar líklega í kringum 36%. Góðu fréttirnar eru auðvitað að Framsóknarflokkurinn er búinn að festa sig í sessi sem smáflokkur. Spái því að flokkurinn megi þakka fyrir ef hann skríður í tveggja stafa tölu. Jón Sigurðsson er örugglega ekki á þingi, nema að hann detti inn sem uppbótamaður fyrir einhverja slysni.

Á vinstrivængnum er ekkert óeðlilegt að Samfylkingin bæti við sig í kjölfar landsfundar. Einnig held ég að allir hafi vitað að svimandi hæðir í fylgi VG væru eitthvað ýktar. Í raun er allt yfir 15% fylgi stórsigur fyrir VG, svo ég tali nú ekki um nær 20% fylgi sem er vissulega raunhæft. Samfylkingin endar líklega í kringum 25% fylgi sem væru vissulega vonbrygði fyrir flokkinn en alls ekkert hrun eins og margir óttuðust. Fyrir mig skiptir mestu máli að vinstriflokkarnir tveir verði nálægt 45% fylgi samanlagt, ca. 20% VG og 25% Sf.

Samfylkingin eykur verulega fylgi sitt á kostnað VG

Hvaða flokkur fer ekki í ríkisstjórn á eigin forsendum?

Meira að segja Framsóknarflokkurinn fer í ríkisstjórn á "eigin forsendum", þeirra forsendur koma bara hugsjónum og stefnu lítið við, snúast um stóla, störf og aðra bitlinga.

Hvað er Árni Páll að fara hér? Hvað þýðir það að Samfylkingin fari bara í ríkisstjórn "á eigin forsendum": Þýðir það að Samfylkingin setjist bara í ríkisstjórn þar sem þeir ráða öllu? Slíkt væri alveg ótrúlegur hroki. "Skiptir engu máli hversu margir kjósa okkur, við viljum ráða öllu". Ég trúi því varla að Árni Páll hafi meint þetta svona. Þá væri gott að vita hvað hann er í raun að fara. 

„Samfylking fari einungis í stjórn á eigin forsendum"

Jæja, vinstriflokkarnir allavega miklu stærri en Sjálfstæðisflokkurinn

Sem vinstri grænn þá er ég auðvitað mjög ánægður með mína menn. Það er varla að maður trúi þessu. En ég hef áhyggjur af Samfylkingunni, vil að hún hressist. Svo virðist sem Íslandshreyfinging sé alls ekki að ná sér á strik. Vona að hún verði ekki þess valdandi að stjórnarflokkarnir haldi meirihlutanum. Framsókn er föst í einstafstölu, skríða líklega upp í 11-12% í kosningunum. Þessi flokkur er á útleið sem áhrifaflokkur í íslenskri pólitík og er það vel. Spái að hann festist í 5-10% á næstu árum eins og miðflokkarnir í Svíþjóð og Noregi. Við erum að fara úr fjögraflokkakerfi í 3+2 eða 3+3 kerfi, allt eftir því hvernig Í gengur. 1 stór hægriflokkur, 2 stórir vinstriflokkar og 2-3 smáflokkar sem vissulega geta komist í oddastöðu.

Fylgi Samfylkingar minnkar enn