Sorglega líkt og heima í vor

Úrslitin í þingkosningunum í Danmörku eru sorglega lík úrslitunum á Íslandi sl. vor. Vinstriflokkur bætir stórlega við sig, kratar standa í stað og fram kemur nýtt framboð sem virðist hafa mikinn byr í upphafi en botninn dettur síðan úr framboðinu á lokasprettinum. Og svo það sorglega, hægristjórn rétt hangir með meirihluta þrátt fyrir að hafa dottið út um nóttina. Vissulega er sigur SF glæsilegur og ég fagna sigrinum með félögum mínum í Danmörku, en vonbrigðin með að stjórnin haldi eru sár. Sérstaklega ef kratarnir í Færeyjum hefðu druslast til að ná manni inn og þar með gert alla færeysku og grænlensku þingmennina rauða þá hefðu áhrif rasistaflokksins Dansk folkeparti verið minnkuð verulega. Nú hangir hægristjórnin á bláþræði með stuðningi Piu Kærsgaard og er það hroðaleg staða. Betra hefði verið að stjórnin hefði þurft að reiða sig á Naser Khader.

Fogh áformar ekki að breyta stjórnarforminu

Hver kaus spánarkonung?

Nú finnst mér Chavez hafa verið með óþarfa upphlaup á fundinum og e.t.v. fulllangt gengið að kalla Aznar fasista, þó vissulega hafi sá asni verið spánverjum til skammar með þjónkun sinni við klerkastjórnina í Washington. En vissulega á flokkur Aznar rætur sínar í fasistaflokki Franco þó flokkurinn hafi vissulega lagast mikið síðan þá. En mér er spurn, hver kaus Juan Carlos? Í hvaða umboði talar hann? Var hann e.t.v. svona uppstökkur vegna þess að alþjóð veit að það var sjálfur fasistaeinræðisherran Franco sem kom honum í embættið?

Spánarkonungur sagði Chaves að þegja

Sérkennilegur fréttaflutningur

Fréttaflutningur Morgunblaðsins af dönsku kosningabaráttunni virðist vægast sagt furðulegur, og virðist frekar einkennast af óskhyggju frekar en raunveruleikanum. Kratarnir virðast eitthvað vera að síga, en það er meira en bætt upp með stórsókn systurflokks VG, Sosialistik folkeparti, sem stefnir í að meira en tvöfalda fylgi sitt. Þriðji vinstriflokkurinn, Enhedslisten er núna líka inni (yfir 2%) samkvæmt nýjustu könnunum. Politiken segir líka samkvæmt síðustu könnunum þá séu það stjórnarandstöðuflokkarnir sem séu jafn nálægt því að ná meirihluta einir og ríkisstjórnarflokkarnir. Enn virðist allt benda til að flokkur Nasser Khaders muni vera í oddastöðu.

Kosningarnar eru allavega mjög spennandi og allt getur gerst. Félagar okkar í Danmörku þurfa því augljóslega að bretta upp ermarnar til að tryggja að ríkisstjórnin falli.

Allt bendir til þess að danska stjórnin haldi velli

Össur í þýsku ríkisstjórninni?

Hvernig er það, er þetta ekki þýski fáninn bak við Össur. Ekki veit ég til að íslenski fáninn sé rauður, svartur og gulur. Er Össur þarna á vegum þýsku ríkisstjórnarinnar?

Össur átti fund með forseta Filippseyja

Dönsku þingkosningarnar

Þar sem kosningar fara nú í hönd í Danmörku ákvað ég að taka "próf" á Politiken til að sjá hvar ég stæði væri ég kjósandi í Danmörku. Að flestu leiti komu mér úrslitin ekki á óvart, ég á samkvæmt þessu að kjósa annað hvort Enhedslisten eða Socialistik folkeparti. Helst kom mér að óvart að kratarnir skyldu lenda neðar en bæði Radikale venstre og kristilegir. Ég á síðan augljóslega að forðast ríkisstjórnarflokkana. Það sem fleytti ø yfir f var að ég er algjörlega á móti því að mismunun sé leifð í opinbera kerfinu samkvæmt greiðslu. Hér kemur niðurstaðan mín:

Jón og séra Jón

Það er greinilegt að hér er skipulagið í lagi og allt gert til að bjarga fólkinu frá þeim ósköpum sem þessar náttúruhamfarir skapa. Er ekkert nema gott um það að segja. Spá mín er líka sú að hratt og vel verði staðið að uppbyggingarstörfunum þegar hamfarirnar eru búnar. Það er ótrúlegur munur á þessum viðbrögðum yfirvalda í Bandaríkjunum og þeim hryllingi sem menn upplifðu í New Orleans þegar fellibylurinn fór þar yfir fyrir nokkrum árum. Skildi það hafa eitthvað með það að gera að íbúar New Orleans voru/eru að stórum hluta fátækir og svartir meðan þetta svæði í suður Kaliforníu er eitt það ríkasta í heimi. Það skildi þó ekki vera að það skipti máli hvort þú ert séra Jón eða bara Jón í "guðs eigin landi"?

Hálf milljón manna hafa yfirgefið heimili sín

Vel að þessu kominn

Joaquim Chissano er vel að þessum verðlaunum kominn. Þó vissulega hafi ríkisstjórn hans ekki verið gallalaus og einhverja spillingu hafi verið að finna þar, þá hefur Chissano sjálfur aldrei verið talinn spilltur og ríkisstjórn hans lausari við spillingu en flestar ríkisstjórnir fátækra landa. Vissulega er margt að í Mósambík, landið er enn fátækt og er enn að berjast við arfleið stríðshryllingsins sem Apartheid stjórnin í Suður Afríku og Bandaríkjastjórn sponseruðu. Sérstaklega þarf að bæta kjör hinna fátækustu. En Mósambík hefur gert betur en mörg önnur lönd og geta gert vel ef þau láta ekki Alþjóðabankann og Alþjóðagjaldeyrisstofnunina stjórna efnahagskerfinu.

Fyrrum forseti Mósambík fyrstur til að hljóta ný verðlaun

Frábært grín með alvarlegum undirtón

Þó að þetta sé auðvitað grín þá er undirtónninn alvarlegur. Áður var réttilega gert "grín" að fáránlegum stuðningi fyrrverandi ríkisstjórnar við stríðsglæpina í Írak, "Ísland tilbúið að styðja hernaðinn í Írak til hins síðasta bandaríska blóðdropa! Nú köllum við "herinn" heim frá Írak (þ.e.a.s. Herdísi) og það er auðvitað þrælfyndið. En alvarlegi undirtónninn eru auðvitað pólitísku skilaboðin sem við sendum, við erum hætt að styðja árásarstefnu BNA í Írak. Betri landkynningu er ekki hægt að fá.  Virði 100 auglýsinga í New York Times.

Pólitíski undirtónninn er auðvitað að m.a.s. litla Ísland er hætt að styðja við bakið að Írak stríðinu. Batnandi mönnum er best að lifa, þó vissulega hafi upphaflegur stuðningur Davíðs og Halldórs í nafni íslensku þjóðarinnar verið skandall. 

Osama bin Laden „hatar Björk“

Rétt ákvörðun

Al Gore, sem réttilega var kosinn forseti Bandaríkjanna árið 2000 ef úrslitin hefðu ekki verið manipúleruð í Flórída, tók rétta ákvörðun með að fara ekki í framboð. Hann hefur lítinn möguleika gegn Clinton og Obama. Persónulega vonast ég eftir að Obama verði valinn forsetaefni Demókrataflokksins, ég treysti Clinton einfaldlega ekki. Obama er með tiltölulega heilbrigðar skoðanir í utanríkismálum og myndi vonandi breyta töluverðu. Giuliani er hins vegar stórhættulegur og verður vonandi ekki kosin heimsbyggðarinnar vegna. Menn mega samt ekki búast við of miklu af verðandi forseta Bandaríkjanna. Vissulega verður framför af því að losna við B*sh, en það er fjarstæða að ætla að einhver vinstrisinni verði kosinn. Obama, sem er lengst til vinstri af þeim sem hafa möguleika á kjöri er samt ekki róttækari en hægri armur Samfylkingarinnar í besta falli. Svona eitthvað til hægri við Merkel í Þýskalandi.

Al Gore útilokar forsetaframboð

Samfélagslaun, framhald

Ég kom með þá hugmynd fyrir nokkrum dögum að við tækjum upp samfélagslaun í stað þess kraðaks bóta, lífeyris, námslána og félagsstuðnings sem nú tíðkast. Þessar tölur styrkja þá skoðun mína að ekki einungis séu slík laun æskileg heldur vel framkvæmanleg. Ef við tökum heilbrigðismálin út úr þessu dæmi (þurfum auðvitað að reka heilbrigðiskerfið áfram) eru framlög til annarrar félagsverndar 144.5 milljarðar. Ef við gefum okkur að um 200.000 einstaklingar yfir 18 ára séu í landinu og reiknum þeim 170,000 í samfélagslaun á mánuði þá gerir það 408 milljarða í samfélagslaun. Reiknum síðan 30,000 krónur í barnabætur á mánuði fyrir öll börn, sem eru um 100.000. Það gerir 36 milljarða. Heildar samfélagslaun eru því 444 milljarðar á ári. Þar sem nú hafa allir fullorðnir einstaklingar 170,000 á mánuði í samfélagslaun þá má reikna með að laun lækki sem því nemur. Þessa upphæð er hægt að rukka fyrirtækin í gengum skatta á umsvif (ég legg til blöndu af veltusköttum og nefsköttum á starfsmenn). Ef við gefum okkur að u.þ.b. 70% fullorðna séu í fullu starfi þá er hægt að rukka launagreiðendur um 170,000*12*140,000 í skatta á umsvif þar sem það kemur í sama stað niður fyrir fyrirtækin vegna þess að laun lækka sem því nemur (athugið að launagreiðslur á vegum ríkisins skipta ekki máli þar sem þær eru bara millifærsla á fé). Heildartekjur af slíkum sköttum væru því 285,6 milljarðar. Mismunurinn á þessu og útgjöldum vegna samfélagslaunanna er því einungis 158,4 milljarðar sem er ekki mikið meira en þeir 144.5 milljarðar sem fara í félagsvernd að frátalinni heilsugæslu. Þetta er því vel kljúfanleg. Þetta eru auðvitað ofureinfaldaðar tölur en samt nærri lagi.

Með því að taka upp samfélagslaun er hægt að tryggja öllum mannsæmandi kjör. Það kemur öllu samfélaginu til góða. Þegar menn hætta að hafa áhyggjur af því að eiga í sig og á má færa rök fyrir því að kostaður við heilsugæslu lækki. Einnig má færa rök fyrir því að framleiðni aukist bæði vegna þess að laun láglaunafólksins hljóta að aukast stórlega og því hvati hjá fyrirtækjunum að hámarka framleiðni (sem er vandamál á Íslandi). Allir fá eitthvað við sitt hæfi, bæði hægri og vinstrimenn. Hægrimenn sjá ríkisbáknið minnka því nú er engin þörf á því að vera með her skriffinna sem eru nú að reikna bætur og bótaskerðingar. Opinberum starfsmönnum hlýtur því að fækka, sem kemur síðan einkageiranum til góða. Báknið burt verður því að raunveruleika. Vinstrimenn sjá drauminn um réttindi allra samfélagsþegna til mannsæmandi lífs verða að veruleika og samfélagslaun munu síðan leiða til stórfelldrar launajöfnunar þar sem lægstu laun hljóta að hækka til muna. Þetta eru auðvitað róttækar hugmyndir, en eitthvað verður að gerast til að sporna við aukinni misskiptinu í samfélaginu. Annars er voðinn vís, í dag stefnum við hraðabyri að því að skapa stóra stétt láglaunafólks sem horfir á auðsköpun samfélagsins renna sífellt í hendur færri ofsaríkra aðila. Slíkt er vísir að stórfelldum samfélagsvandamálum með aukinni glæpatíðni o.s.f. Slíkt ætti enginn að vilja sjá.

Yfir 220 milljörðum varið til félagsverndar