VÍS stjórn í burðarliðunum?

Þá er komin fram fyrsta skoðanakönnunin eftir að framboð Íslandshreyfingarinnar kom fram. Það stefnir í það sem ég spáði að flokkurinn fengi um 5-6% fylgi. Sjálfstæðisflokkurinn fer mest niður, um 3% meðan VG fer niður um 2.3%. Framsókn festist í sessi sem einnar tölu flokkur og F er hægt og sígandi að þurkast út. Virðist að veiðiförin út í hið grugguga vatn útlendingafordóma reynast flokknum dýrkeypt. Eitthvað umhverfisverndarfylgi mun fara frá VG til Í, en vinstriflokkarnir V og S sameiginlega virðast halda sínu sæmilega vel. Það getur þó enn margt gerst í kosningabaráttunni.

Bestu fréttirnar við þessa könnun eru þær að samkvæmt henni eru Vinstrihreifingin, Samfylkingin og  Íslandshreyfingin með meirihluta á þingi, 16+14+3 þingmenn. Ef þetta yrðu úrslit kosninganna þá gæti næsta ríkisstjórn litið eitthvað svona út:

Forsætisráðherra:                             Steingrímur J. Sigfússon

Utanríkisráðherra:                            Össur Skarphéðinsson

Fjármálaráðherra:                            Ingibjörg Sólrún Gísladóttir

Umhverfisráðherra:                          Ómar Ragnarsson

Viðskipta og iðnaðarráðherra:          Ögmundur Jónasson

Menntamálaáðherra:                        Katrín Jakobsdóttir

Félagsmálaráðherra:                        Margrét Sverrisdóttir

Sjávarútvegsráðherra:                    Ágúst Ólafur Ágústsson

Dómsmálaráðherra:                         Atli Gíslason

Landbúnaðarráðherra:                    Björgvin Sigurðsson

Heilbrigðisráðherra:                         Þuríður Backman

Samgönguráðherra:                        Jóhanna Sigurðardóttir

Þetta yrði örugglega mjög góð ríkisstjórn.

 

 

 

Íslandshreyfingin með 5% fylgi samkvæmt skoðanakönnun Fréttablaðsins

Athugasemdir

[Hlynur Hallsson, 25.3.2007 kl. 14:35]

Já, mér líst vel á þessa stjórn. Bestu kveðjur,

[Frank M Michelsen (IP-tala skráð) 25.3.2007 kl. 15:31]

Mig langar að gráta úr mér augun þegar ég sé þessi nöfn nefnd í sömu setningu og hugsanlega ríkisstjórn.

[Guðmundur Auðunsson, 25.3.2007 kl. 19:34]

Ég veit að ég er á réttri leið þegar hægrimenn eru farnir að gráta úr sér augun.

[Sveinn Rúnar Hauksson (IP-tala skráð) 27.3.2007 kl. 23:58]

Innilega sammála þér, eins og oft áður. Þetta yrði góð stjórn. Gleymdu ekki afmælinu mínu 10. maí. Mig langar í atkvæði á afmælisgjöf. Láttu það ganga.

Innilegar hamingjuóskir héðan úr Depluhólunum með nýfædda soninn.

Sveinn Rúnar

[Anton (IP-tala skráð) 28.3.2007 kl. 13:21]

Ögmundur sem viðskiptaráðherra, hvað yrðum við lengi á hausinn?

[E.Ólafsson, 6.4.2007 kl. 15:57]

Tel persónulega að VG og Samfylking muni á endanum ekki sjá sér fært um að vera saman í stjórn.  Það er samt nokkrir stórir gallar á þessari ríkisstjórn þinni, sem ég ætla að nefna.

 1.  VG og Samfylking muna aldrei treysta Ómari að gegna Umhverfisráðuneytið, því ef ráðuneytið er beitt rétt þá hefur það mikil völd gegnum skipulagsstofnun og EES samninginn.   Um leið tel ég það full bjartsýni af flokkur Ómars fái 2 af 12 ráðherrum.

2.   Þú setur Björgin Sigurðsson sem landbúnaðarráðherra, en hann hefur sérhæft sig í menntamálum.  Hann hefur ekki verið sérstaklega hliðhollur bændum og gagnrýnt þá auk þess að hefð hefur verið að bóndi eða einhver tengdur stéttinni sé ráðherra.

3.  Þú setur Jóhönnu sem samgönguráðherra, en hún hefur lítið sem ekkert beitt sér fyrir samgöngumál heldur mest jafnréttis, tryggingamál og  aukin réttindi þeirra sem minna mega sín.  Efast um að hún sé rétta manneskjan fyrir þetta starf. Það hefur ekki heldur verið samgönguráðherra úr Rvk/reykjanes síðan 1983 með Matta Matt

4.  Líka tel ég furðulegt hjá þér að halda því fram að 2 nýliðar VG á þingi verða ráðherra í Atla Gíslason og Katrínu.   Katrín á samt möguleika sem varaformaður flokksins

5.  Samfylkingin og VG hafa báðir talað um að auka vald þingsins og gagnrýnt fjölda ráðherra og því efast ég um að það verði 12 ráðherrar í þessari stjórn. 

[Svala Jónsdóttir, 7.4.2007 kl. 23:50]

Mér finnst ótrúlegt að Samfylkingin myndi sætta sig við að fá fjármálaráðuneytið, samgöngu, landbúnaðar og sjávarútvegs. Sé ekki að þarna sé verið að nýta réttan mannskap í heppileg ráðuneyti. En áhugaverð pæling samt.