Hvar eru Icesave peningarnir?

Landsbankinn safnaði innistæðum sem eru líklega á stærð við fjárlög ríkisins. Þessum góða árangri náðu þeir með því að bjóða hærri vexti en nokkur annar. Það segir sig því sjálft að Landsbankinn hlýtur að hafa verið með flott ávöxtunarprógram þar sem þeirra hlutverk er að miðla sparnaði í fjárfestingar með hagnaði. Enginn banki þolir að það sé gert "run" á þá. Það segir sig sjálft. Sértaklega ef innlánin fara í langtímalán eins og húsnæðislán. En góðu heilli var Landsbankinn ekki í húsnæðislánabransa í Bretlandi. Því hljóta þessir peningar að vera í lánum til skemmri tíma og ætti því að vera hægt að ná þeim til baka og borga sparifjáreigendunum. Við verðum auðvitað að trúa því að Landsbankinn hafi ekki sett þessa gífurlegu fjármuni í ónýtar fjárfestingar, er það ekki? Breski fjármálaráðherrann vakti mig upp á BBC í morgun, æfur út í Íslendinga. Sagði að það virtust vera engir peningar til að borga Icesave innlánin. Við trúum því auðvitað að þetta sé bull hjá ráðherranum, eignir Landsbankans hljóta að borga þetta upp að mestu leiti er það ekki?

Brown hótar aðgerðum

Athugasemdir

[Jón Valur Jensson, 8.10.2008 kl. 11:00]

Heill og sæll, Guðmundur. Gott að fá þetta beint í æð frá London, eins og ég gerði á mínum árum áður í Englandi; það er önnur tilfinning í því að vera á vettvangi og hlusta á þá ræða þetta á BBC4 eða sjónvarpinu heldur en BBC World Service.

Hafi þeir ekki fé, veð eða eignir til að borga þetta upp, er Landsbankinn  og raunar land okkar í gríðarlegum erfiðleikum. Á Davíð seðlabankastjóra var í Kastljósi í gær að heyra, að björgunaraðgerðir Seðlabankans og ríkisins muni fyrst og fremst beinast að Íslendingum, það væri ekki þeirra að bæta fyrir ævintýramennsku bankastjóranna erlendis! En nú hafa Bretar lagt hald á eignir Landsbankans þar í landi, og kemur það naumast á óvart eftir þessar yfirlýsingar Davíðs.

Gæti haft þetta miklu lengra, en læt nægja. Hef sjálfur skrifað um Icesave-málið hér:

• Tryggingasjóður bankainnistæðna á ekki fyrir nema um 1/156 af innistæðum í Icesave
• Landsbankinn Icesave í hættu